چلۆن خۆ لە شەڕی ناوخۆ لە باشوور بەدوور بگرین؟

Kurdane.com

«گژه‌با یاری‌ به‌ ره‌نگه‌كان ده‌كات

گژه‌با له‌گه‌ڵ‌ خۆی‌ گه‌لای وه‌ریو و

شه‌پۆلی‌ تاریكی‌ ده‌شڵه‌ژێنێت

رازه‌كان ‌و پاشماوه‌ی‌ یاده‌كان ده‌وروژێنێت.

خه‌ونەکان دێن ‌و به‌ خێرایی‌ له‌ كۆڵانی‌ بێداریدا

ون ده‌بن.

ئاخۆ زه‌مان خه‌ونئاسا ئاواڵه‌یه‌

یان وێنه‌ی‌ بێداری‌ ته‌نراو؟

سه‌فه‌ره‌كه‌م سه‌ره‌تایه‌

یان كۆتایی‌؟(رەفیق سابیر)* »

شەڕی ناوخۆ تەنیا کاتێک رزگاریبەخشە کەوا شەڕی بەشی هەرەزۆری کۆمەڵگا بێت دژی بەشێکی هەرەکەمی کۆمەڵ؛ وەها شەڕێک سەرکردایەتییەکەی لە دەیان بەرزو نزمی شەڕی پاڕلەمانیدا لەکڵ هاتووەتەدەر و رەوایی و شەرعیەتی نەتەوەیی پەیدا کردووە و جەماوەری هەرەزۆری خەڵک ئامادەیە بە فرمانی هەڵسووڕێ؛ وەها سەرکردایەتیەک هێزەکەی لەدەرەوەی پاڕلەمانە؛ هەروەها هەم پاڕلەمان و هەم حیزبەکانی ناو پاڕڵەمان لەژێر هەیمەنەیدان. بەڵام پاڕلەمانی ئێستا نەک هەر بەدیلی جەماوەر نیە بەڵکوو کەرت بووە بەسەر دەیان کوتلەدا؛ واوەتر لەوەش رەوایەتییەکە نەک هەر لەلایەن سەرۆک و باڵەکەویەوە چووەتە ژێر پرسیار بەڵکوو لەناو جەماوەری خەڵکیشدا وەک بەدیل تماشا ناکرێت. سیستەمی زاڵ لە کوردستانی باشوور هەم خۆی لە رەوایەتی خست و هەم بەدیلی خۆی لە خشتە برد و ناکارا کرد.

هەڵکوتانە سەر پاڕلەمان _پاڕلەمان وەک ئەنجۆمەنی جێبەجێکاری یاسای بنەڕەتی_ واتە هەڵکوتانە سەر یاسای بنەڕەتی؛ یاسای بنەڕتی واتا ئەو خاڵ و جەغزەی کە کۆمەڵ پێی پابەندە؛ پابەند نەبوون بە یاسای بنەڕەتی واتە ئانارشیزم و ئاژاوە ئەگەر ئەنجومەنی کاتی جەماوەری هەرەزۆری کۆمەڵ جێی نەگرتبێتەوە؛ وەها ئەنجۆمەنێک تەنیا قسەکەر نیە بەڵکوو هێزی سەربازی لەپشتە و ئەو هێزە سەربازییەش جێی داکۆکی و داڵدەی جەماوەری هەرە زۆری کۆمەڵە. هیچکام لەم خاڵانە لە کوردستانی باشوور لە ئێستادا بەدی ناکرێت.

 

شەڕی ناوخۆی کوردستان لە ئێستادا نەک هەر ناسیۆنالیزمی داپڵۆسێنەر هارتردەکات _ناسیۆنالیزمی کۆنەباو و داپڵۆسێنەری ئێران، عێراق و ناسیۆنالیزمی تورکیە؛ کەلاکی ناسیۆنالیزمی سوریە تین و تاو دەدا و بەمجۆرە هەژاران لە هەموو لایەک مافخوراتر_ بەڵکوو هاوکێشەی سیاسی بۆ تەرازووی هێزی نێوان سیستەمە سیاسییە کۆنەپەرستەکانی ناوچەکە بەجێ دێڵێت. شەڕێک کە بەرهەمی شکست بێت؛ شکستێک کە هەردوولا تێیدا بەرپرسیارن؛ ناچار ئەنجامەکەی چەندقات پڕخەسارتر و بۆ دواوەیە؛ لە پاڵ داعش و حەشدی شەعبی و ناسیۆنالیزمی عێراقی کەرت و پەرت و گەندەڵدا جەماوەری کوردستان و دەستکەوتەکانی دۆڕاوتر دەکات؛

لە داهاتوویەکی نزیکدا کۆماری ئیسلامی دیسان هەوڵی خۆتێوەردان و کوێخایەتی نێوان یەکیەتی نیشتمانی و بزووتنەوەی گۆڕان دەدات و تاکوو بەمجۆر گۆڕانیش تووشی ریسوایی بکات. لەوانەیە سەرکردایەتی کۆمەڵی ئیسلامی وەک گوشار لەسەر گۆڕان بەکار بێنێ. یەکیەتی نیشتمانیش پێی خۆشە گۆڕانیش تووشی ئەو سەرکزییە ببێت تاکوو هەم ئەوەی خۆی پێ داشارێت و هەم گۆڕانیش بخاتە دۆخی نزمتر لە خۆی؛ پارتی دیمۆکراتیش زیاتری پێ خۆشە و کۆمەڵی ئیسلامی و یەکگرتووش لە هەردووکلا زیاتر. هەموو ئەم شانۆیە لەکاتێکدا دەڕواتە پێش کەوا کۆماری ئیسلامی مایەی نەفرەت و تووڕەیی نەک کوردستانی باشوورە بەڵکوو رۆژهەڵات و رۆژاواشە. لە درێژماوەدا ئەم خۆتێهەڵقورتاندنەی تاران بە زیانی پارتی دیمۆکراتیشە و لە هەموویان زیاتر بە زیانی جەماوەری خەڵکی باشوور.

 

نە حیزبی دەعوە و نە ئەلعێراقییە تازە نابنەوە بە بەدیل چونکوو ناسیۆنالیزمی عێراقی لەناوخۆدا هەم وزە و هەم ورەی مێژوویی شکاوە و گەندەڵ و پەرتەوازە بووە؛ جیالەوەی پێکهاتەی ناسیۆنالیزمی نوێی عێراق چەندقات کۆنەباوترە لەوەی پێشوو، شەڕی ناوخۆی ناسیۆنالیزمی نوێی عێراق (بەزمانی ناسیۆنالیزمی کورد شەڕێ براکوژی عێراقیەکان) هەموو بنەماکانی مرۆڤایەتی تێپەڕاند؛ برایانی دینی عێراقی/عەرەب لەهەردوولا نەک هەر یەکتریان کوشت و سەربڕی بەڵکوو تەرمی یەکیشیان شێواند؛ لەلایەکیتریشەوە شەڕی تاقمەکان لەسەر سەرچاوەسرووشتییەکان تەشەنە بەم شەڕە دەدات گەرچی شاراوە: نەوت لە دونیای سەرمایەدا لەعنەتە نەک رەحمەت!

باڵادەستانی عێڕاقی دەیانەوێ لەسەر داپڵۆسینی کوردەوە شکستەکانی خۆیان سواخ بدەنەوە؛ ئەو باڵادەستانەی کەوا تەنیا لەسەر دەستی داپڵۆسینی کورد و تاڵانکردنی سەرچاوەسرووشتییەکانی خۆی دەپارێزێت؛ ئەو داپڵۆسینەی کە هاوکات داپڵۆسین و تاڵانکردنی گەلی هەژاری عێراقیشە بەگشتی؛ تاڵانکردن و بێ مافکردنی هەژارانی عێراقی بۆ پڕچەک و تەیارکردنی دووباڵی سەربازی شیعەو سونە کە دوای ماوەیەکیتر ترسیان لەیەکتر زیاترە وەک لە کورد؛ ئەوانەی کەوا لە "شەڕی براکوژی" خۆیاندا یەکتریان سەربڕی و تەرمی یەکتریان شێواند؛ کام ئایدۆلۆژی سەری یەکتری پێ بڕین و کام ئایدۆلۆژی ئەم سەربڕینەیان پێ لەبیر دەباتەوە! مەگەر پارەی کوردستان! نەوتی کوردستان! باج و گومرکی کوردستان! ئەمەش واتە شەڕی کورد/عەرەب کە ناسیۆنالیزمی کورد و عەرەب جاڕی دەدەن زیاتر لە قووتدانی یەکتر شەڕی دووباڵی گەندەڵی سەرمایە لە عێراق و کوردستان. کە لەسەر دەستی بێبەشکردنی جەماوەری هەژار و بێدەرەتانی هەردوولا بەڕێوەدەچێت؛ هیچکەس وەک هەژاری کورد و عەرەب هەست بەمە ناکات؛ ئەو جەماوەرەی کە لە هەردووکلا ئاوارەیی خۆی دیوە کە هاوکات بووە لەگەڵ پارێزراوی هاوزمانە باڵادەستەکەی خۆی. لە ئێستادا هەردوو چینی بندەستی کورد و عەرەب کەوتوون چونکوو وشیاریی سیاسییان بنکۆڵ کراوە (چونکوو لە شەڕی مێژوویی کار دژی سەرمایەدا کار کەوتووە، رەنگدانەوەی سوبژێکتیڤی ئەو دوانە وامان پێ دەڵێمن)  و هیچ هیوایەک بۆ هەستانەوەی هاوبەشیان نیە و بۆیە ناچار شەڕی ئێستا رێگری کردنی "هێزی گەندەڵی عێراق"ە بۆ پاوانکاری و تاڵانکاری کورد؛ ئەو رێگرییە واتە لاوازکردنی گەندەڵی عێراق بەدەستی جەماوەری خەڵکی کورد.

ئەمانە ناتوانن ببنە پێکهاتەیەکی قایم بۆ ناسیۆنالیزمی نوێی عێراق؛ شەڕی ناوخۆی کوردیش بۆ ناسیۆنالیزمی عێراقی تەنیا وەک فوو تێکردنە بە بەر تەرمێکی مردوودا؛ فووی کەرامات، ئەفسوون، جادوو، سیحر و موعجیزە! و دواجار ئەو ناسیۆنالیزمە هەر مەحکوومە بە شکست؛ ناسیۆنالیزمی عێراقی لەسەر دەستی سەرکوتی کورد لەبەرژەوەندی وڵاتانی رۆژاواشدا نیە گەر هەبایە سەدام لە هەموویان زیاتر شکۆی پێ دابوو چونکوو لە عیبادی و حەشد زیاتر کوردی سەرکوت کردبوو کەچی شکۆی تێکڕووخا. بەم پێیە شکانی کەرکووک هاوکات شکانی عێراق و کورد بوو تاکوو تەمەنی مانەوەی ئێران و تورکیە و وڵاتانی رۆژاوا لە عێراق درێژ بکەنەوە؛ شکانی عێراق لە هەناودا تاکوو روخساری شەرمێونی خۆی بە سەرکەوتنێکی رووکەشی داشارێ؛ بەواتایەکیتر و لە درێژماوەدا شکستی کەرکووک زیاتر لە کورد شکستی عێراقیش بوو؛ قسەکانی عیبادی بە نوێنەرەکەی ئامریکا دوای شەری کەرکووک ئەو خەونە درۆیینەی کەوا بۆیان دیوە ئاشکرا دەکات؛ خەونی عێراقی سەربەخۆی دیمۆکراتیک! عێراقی یەکگرتوو!؟ ئەویش لەسەر دەستی سەرکوتی دیمۆکراتیکترین بەشی خۆی؟! واتە کوردستان!؟ بەڕاست عیبادی هێن گەمژێنراو و گەوجێنراوە بە نوێنەری ئامریکا بڵێ: کەس بۆی نیە خۆی لە پرسی عێراقەوە وەربد لە کاتێکدا خۆی دەزانێ ئێران لەپشتی جێگرەکەی نووری مالیکی و لە پشتی شکانی کەرکووک بوو!! لە وتاری پێشوودا وتمان خیانەت لە کورد بە هاوکاری چەند دەوڵەت و بۆرۆکراسی کوردستانی باشوور دەکرێ؛ ئەوە ئاشکرا بوو.

 

سەرمایەی جیهانی لە چەقی وەرچەرخانی خۆی _واتە رۆژهەڵاتی ناوەڕاست _ لە خۆرێخستنەوەی سەرلەنوێی خۆیدایە؛ سەرمایە سەلماندوویەتی کەوا لە سیستەمی دیسپۆتیست و کۆنەپەرستی ئایینیەوە بگرە تا سوشیال دیمۆکراسی لەگەڵ هەمووی هەڵدەکات؛ کورد نە ئەوپەڕە و نە ئەم پەڕ بەڵام لە ژینگەو دۆخی ناوچەیی یەکەمدا دەژی؛ بەحرێک لە ئاژاوە، لە بێهیوایی؛ لە دابڕان کەوا تەنیا "پێوەندییەنێودەڵەتییەکان" سواخیان داوە! بۆیە دۆڕانی کورد سەرکەوتنی مۆدێلی یەکەمی سەرمایەیە؛ ئیرادەی کورد گەرچی ناتوانێ سەرمایەی جیهانی لە ناوچەکە کەڵەوەپێچ بکات بەڵام وزەی تێدایە بەرەو ئاقاری دووهەمی بەرێت؛ لەم رێڕەوەدا چەپ و راستی پێشکەوتنخواز لە کوردستان دەتوانن پێک بێن؛ وەک چۆن لەبەرابەر هیتلەردا.

لە تاریکەسەلاتی ئاسمانی رۆژهەڵاتی ناوەڕاست تەنیا ترووسکاییەک دەتوانێ رۆح بکاتە بەر ئاسمانی داهاتوودا، بزووتنەوەی دیمۆکراتیکی کوردە؛ ئەم گرژییەی ئێستا ئەگەر لایەنەکان بە ورییاییەوە مامەڵەی تێدا نەکەن دەبێتە هۆی شکانی کورد لە رۆژاوا و رۆژهەڵات و خەونی باکووریش دورەدەستتر دەکات؛ دیسپۆتیزم و ملهۆڕی لە تورکیە و لە ئێران کاتێک بەهێزتر دەبێت کەوا بزووتنەوەی دژی ملهۆڕی تووشی نسکۆ بێت؛ کورد بەچاوی خۆی بینیویەتی بزووتنەوەی کورد هەوێنی شکانی ئیستیبداد و ملهۆڕییە لە ناوچەکە بوو؛ وەری جەماوەری سەرمایەی سیاسی/مێژوویی هەر بزووتنەوەیەکی پێشکەوتنخوازە کە هەوێنی سەرهەڵدانی داهاتووی نزیکە؛ شەڕی ناوخۆی باشوور لە ئێستادا دەتوانێ نەک ئەو داهاتووە دوور بخاتەوە بەڵکوو لە خەساری بەرێت بۆ چەندین دەیە؛

بۆیە دەبێ کورد خۆی رێکبخاتەوە بۆ سەرکەوتنی داهاتوو کە ئاسۆی لێ دیارە! بێگومان هەرجۆرە گۆڕانکارییەک دەبێ دەسەڵاتی سیستمی هەنووکەباوی باشوور کەم بکاتەوە بە قازانجی جەماوەری خەڵک؛ خەڵکێک کەوا پاڕلەمانێکی نوێ دەخوڵقێنی؛ پاڕلەمانێک کە تەنیا داخوازی دوور و نزیکی جەماوەر جێبەجێ دەکات؛ جەماوەرێک کە دایم لە شەقامدایە تاوەکوو هەم لەلایەک سیستەمی دەسەڵاتی دۆڕاوی ناوخۆ پاڕەمانەکەی هەراو و بنکۆڵ نەکرێت و هەم لەلایەکیتریشەوە دۆژمانی دەرەکی نەوێرن چاوی لێ سوور بکەنەوە و پێی نەوێرن؛ وەها پاڕلەمان/جەماوەرێک نەک دەستوورەکەی جێگیرە بەڵکوو هەمیشە لەحالێ باڵاکردنیشدایە؛ لە گەشندەییەکی دینامیکدایە؛ فۆرمێک کەوا لە پێوەندییەکی ئۆرگانیک و زیندوودایە لەگەڵ ناوەرۆک. تەنیا زامنی پەڕینەوە لەم قۆناغەش ئەوەیە کە جەماوەری خەڵک دیسانەوە سنووری وەهمی حیزب تێپەڕێنن و شەقامێکی یەکگرتوو بۆ خوڵقاندنی کەشێکی دیمۆکراتیکی نوێی نیشتمانی پێک بێنن؛ (ئەمە ئەرکی ئەندامانی ساغ و دژی گەندەڵی و بوێری حیزبەکانیشە کە کەمیش نین); خەڵکی باشوور تۆزێ خەونی گەورەتر نەبینن خەونە گەورەکانیش دەبنە تۆزی بانان! خەڵکی باشوور لە راپەڕیندا سەلماندوویەتی ئەو بەهرەی تێدایە؛ با بزانین مێژوو ئەمجارە چلۆن دووپات دەبێتەوە: تراژیک یان کۆمیدی!

 

بەڵام میکانیزمی وەها پەڕینەوەیەک بە ناچار لەم چەند خاڵی پڕەنسیپی روونەوە دەست پێ دەکات:

یەکەم: شکستی کەرکووک گریمانەی یەکەمە بەڵام  لەئەگەری نەبوونی هێزی بەدیل و پەرتەوازەییدا ئەم شکستە لە هەم لە کەرکووک جێگیرتر و پڕلق و پۆتر دەکات هەم پەرەی پێ دەدات بۆ هەموو کوردستانی باشوور.  سەمای بووکیلەی دیمۆکراسی فۆرماڵ/لیبڕاڵ کە سەرمایەی وابەستە هەڵیسووڕاند بە دۆڕانێکی گەورە کۆتایی هات بەڵام تەنیا ئاپۆرەی خەڵک دەتوانێ دەستی ئەفسووناوی و تەقلەبازی لیبراڵیزم راگرێ کە ئەم بووکیلە هەڵئەسووڕێنێ چونکوو بووکیلە دواجار بێڕۆح و گیانە. بوونی خەڵک لە شەقامدا واتە بوونی گیانێک بۆ ئەم بووکیلە کە لە نانی شەو زەرووترە.

دووهەم: سازان لەگەڵ سیستەمی زاڵی سیاسی گریمانەی دووهەمە. ئەو سیستەمەی کە هەم شکانی شکۆی خۆی و ورەی جەماوەر و بەمجۆرە بەدیلی خۆی لە شانۆە تراژیکەکانی کەرکووک و شەنگالدا نواند؟ بەڵێ! یانی دیسان دەبێ چینی بندەستی باشوور شان بداتەوە بەر تاڵانکاران تاکوو دیسان لەسەر شانی ئەمان هەستنەوە! تاکوو لەسەر شانی خۆمان لەداهاتوودا بمانچەوسێننەوە؟ بەلێ! نەک لە داهاتوو بەڵکوو هەر لە ئێستەوە ئەم چەوساندنەوە دەست پێدەکاتەوە! ئەم چەوساندنەوە بریتییە لە چی؟ لە پاشکۆدا دێمەوە سەری. بەڵام ئەم چەوساندنەوە لە ئێستادا بە قازانجی خەڵکیشە؛ هەندێجار بۆ چینی بندەستی بێبەری لە هەموو شتێک (کە جیالە بوونی خۆی ئەویش ئەگەر بتوانێت ئیش بکات) بچەوسێتەوە باشە وەک لەوەی هەر نەچەوسێتەوە! ئەگەر ئەو چەوسانەوە پاروویەک نانی بۆ خوانی ئێوارەی سەدان هەزار خەڵکی هەژار تێدابێت. لەبیرمان نەچێ هێزی سەربازی ئێستای کوردستانی باشوور کە بەسەر پارتی و یەکیەتیدا دابەش بووە پێکهاتووە لە رۆڵەی پاڵە، سەپان، جووتیار و وەرزێری کەمداهاتی گوندەکان، بێکارانی شاراوە، کرێکاران. بەشی هەرەزۆری ئەمانە لە ئێستادا بڕوایان بە یەکیەتی و بە پارتی یان بەتەواوەتی نەماوە یان زۆر کاڵ بووەتەوە؛ باوڕی جێگرەوەی لەواندا باوەڕێکی نیشتمانییە کە دەسکەوتی ئەم شکستەیە! ئەمانە لەم حیزبانە و باقی رێخراوەکانیاندا وەکوو هەموو کرێکار و فەرمانبەرێکیتر تاقە هەلی کاری کوردستانیان هەڵبژاردوە. شەڕی پارتی و یەکیەتی دەتوانێ ئایدۆلۆژیای نوێی حیزبییان بۆ بخوڵقێنی و ئەو ئایدۆلۆژیی و بڕوا نیشتمانییەیان کاڵ بکاتەوە هەربۆیە دەبێ کوردستان خۆ لەشەڕ ببوێرێ.

سێیەم: سیستەمە سیاسییە لیبراڵییەکان لە کەشی گرژ کە خەڵک تێیدا ئامادەیی خۆڕێکخستنەوەی نیە بەهرە وەردەگرن بۆ بێدەنگکردنی جەماوە تاوەکوو خۆیان بە ئاسوودەیی دەسەڵاتی سیاسی و سامان و سەرمایەی وڵات لەنێوان خۆیاندا دابەش بکەن. گومانی تێدا نییە یەکیەتی و پارتی  لەوپەڕی گرژیدان بەڵام لەبیریشمان نەچێت ئەوان پەیمانی ستراتیژیکیان پێکەوە هەیە. ئەم دوستایەتی/دوژمنایەتییە پەیوەستە بەوەی چەندە ئەو ئیمتیازانەیان پارێزراوە کەوا تا پێش شەڕێ کەرکووک بوویانە کە خۆی لەخۆیدا پەیوەستە بە یەکپارچەیی عێراقییەکان بۆ پەلاماردانی زیاتری کوردستان لەلایەک و لەلایەکیتریشەوە پەرتەوازەیی خەڵکی کوردستان بۆ بەرنگاربوونەوەیان؛ ئەو ئیمتیازانە دیوی ئەودیوی داماڵینی خاوەندارێتی بووە لە خەڵک؛ خاوەندارێتی سەرچاوەسرووشتیەکان؛ چاڵەنەوتەکان، گومرگ و باجی نیشتمانی و سەرانە.

پاشکۆ:

ئێستا نۆرەی شانۆنامەیەکی نوێیە.

چەوساندنەوەی چینی بندەست بەدەستی سیستمی سیاسی/ئابووری زاڵی باشوور لە بنەڕەتدا داماڵینی خاوەندارێتی زیاترە لە ئاپۆرەی خەڵک: خاوەندارێتی سیاسی و لەوەش بنەڕەتیتر خاوەندارێتی سامانی سرووشتی و سەرمایە. بە کوردی یەکیەتی و پارتی پێک دێن لەسەر رکێفکردنی تەرخانکردنی بەشی هەرەزۆری ئەو سەرچاوەسرووشتییانە بەو مەرجەی جەماوەری خەڵک لە شەقامدا نەبن. شکانی کەرکووک شکانی داهاتی هێزی سەربازیشە و هاوکات کەمبوونەوەی داهاتی باڵادەستانیشە لە کوردستان بە قازانجی باڵادەستانی گەندەڵی عێراقی؛ هەربۆیە زێدەخوازی لەهەردوولا بە زیانی جەماوەری خەڵک لە ئارادایە. بوونی خەڵک هەم بۆ پاشەکشە پێکردنی باڵادەستانی گەندەڵی بەغدا باشە و هەم باڵادەستانی گەندەڵی ناوخۆ، بەڵام ئەگەر نوینەرانی جەماوەری خەڵک پشتئەستوور نەبن بە جەماوەری خەڵک ئەوا باڵادەستانی باشووری کوردستان ئەم شکستە دەخەنە سەرشانی جەماوەر و لەم دابەشکردنەوەی سەرلەنوێیەدا ئیمتیازەکانی خۆیان دەپارێزن؛ ئیمتیازگەلێک کەوا دۆڕانی کەرکووک کەمی کردۆتەوە و بەمجۆرە پاڵەپەستۆی شەڕ بۆ ئیمتیاز زیاتر دەکات.

بەپێی ئەم راستییانە کە لەسەرەوە باس کرا، تەنیا زامنی هەڵنەگیرسانی شەڕێ ناوخۆ، هەڵگیرسانی شەڕێکی ناوخۆی نوێیە! بەواتایەکیتر رێپێوان و خۆپیشاندانی شەقام بۆ وەستاندنی شەڕێ پارتی و یەکیەتی لەسەر ئیمتیازەکانیان لەلایەک و لەلایەکیتر وەستاندنی باڵادەستانی گەندەڵی عێراقی زێدەخواز؛ ناسیۆنالیزمی کۆنەباوی هەراوی لێوانلێو لە نەفرەت لە یەکتر.

 

وەک مارکس فێری کردووین باڵادەستان بۆیە سەردەکەون تاوەکوو بەتین و تاوێکی زیاترەوە بکەون بەڵام چینی بندەست و ستەملێکراو بۆیە دەکەوێ کە بە تین و تاوێکی زیاترەوە هەستێتەوە.

*تێبینی: داوای لێبووردن لە دکتۆر رەفیق سابیر کە ئەم هۆنڕاوەیەم بە هەندێ دەستکارییەوە داناوە بۆ ئەوەی لەگەڵ هەلومەرجی سیاسی ئێستای کوردستان بگونجێ.

هوشیار مەحموودی

بۆچونەکان

ناردنی بۆچون