”سەربەخۆ خوازی تێپەڕینە لەهەموو فۆرمەكانی چەوسانەوە”

Kurdane.com

سەربەخۆ بوون، كاركردنە لە بوونیادنانی گەل و تاكێكی وشیار ،كە لەهەمووچەمكەكانی ژیاندا، ناسنامەی نیشتمانیی و كولتووریی خۆی ناسبكات .ڕسكانی كۆمەڵگایەكە ،كە هەموو فۆرمەكانی چەوسانەوە، لە هەمووئاستەكاندا ڕەتكاتەوە.خەلق و ئافراندنی مرۆڤێكە ، هێزی پارێزگاری ئازادی و دابینكردنی سەربەخۆی و فرەچەشنی و هەڵكردن و ئاسانگیری هەبێت .

دروستكردنی گەل و نیشتمانێكە ، لە سەرپاراستنی كەرامەتی ئینسان و مل نەدان بۆ باڵادەستی چەو سێنەرانەی هیچ گەل و هێزێكی باڵادەست، لانیكەم لە ڕووی فكریی و لە ڕەهەندە ئەقڵانی و لۆژیكیەكەیدا. جوڵانی ویژدانی گشتی گەل و تاكێكە ، كە هەست بەبوونی خۆی وەك كاراكتەرێكی چالاكی مێژوو بكات .بەرهەمهێنانی بوون و شارستانیەتێكە لە مێژوودا مامەڵەی ڕێبواری لەگەڵ نەكەن. نەسڕێتەوە. سەربەخۆی خولقان و رسكان وئامادەكردنی ئاوەها گەل و كولتوورێكە. بڕیار نییە تەنیا بریتی بێت، لە /جووڵەیەكی میكانیكی/ بۆ سازدانی شتێ بەناو دەوڵەت . ڕاستە ئەگەر ئاوەها كۆمەڵ و تاكێكت هەبوو، سەربەخۆی هەمیشە گونجاوە و دەستت پێی ڕادەگات . وەگەرنە دەبێتە”مەحاڵێكی مێژوویی” ، وەك ئەوەی تائێستالە مێژووی كورددا بووە. هێزی سەربەخۆخواز هێزی بوونیات نانی نەتەوەی مۆدیڕنە ، خەلقی وشیار و ویستی هاو شاری و هاووڵاتیە . بۆ گەل و كۆمەڵگایەكی وەها، هیچ هێز و دەسەڵاتێ ناتوانی دیموكراتیك و دادوەرو خەڵكی بێت، ئەگەر هێزێكی سەربەخۆ خواز نەبێت .سەربەخۆ خوازی شەڕی نابەرابەر و سەپانی ویستێكی ئێرادەگەرایانە نییە. ئەقڵانیەت و وشیاری و دادگەریی و ویستی جەماوەرە، لە چركەساتی گونجاوی خۆیدا . یادەبێت لە چەوسانەوە و دیكتاتۆریەتی سیاسی و چینایەتی ئازاد بیت ، یا لەهەموو فۆرمەكانی چەوسانەوە . هیچ بزووتنەوە و شۆڕش و هێزێكی كوردی (مانا پەیداناكات و نابێتە بوونێكی مێژوویی) ئەگەر كۆی فۆرمەكانی چەوسانەوە هەڵنەتەكێنێ .كورد هەرگیز بەتەواوی لە ئەو فۆرمانە ڕزگاری نابێت و بوونی مانا هەڵگرنییە، ئەگەر سەربەخۆنەبێت. بوونی كورد تائێستاش بوونێكی ڕێبوارانەیە. مانەوەی بەسراوە بە وەدیهاتنی سەربەخۆییەوە لە چركەساتی گونجاوی خۆیدا.هەموو هەوڵ و جووڵەیەكیش دەبێ لە ئاراستەێ ئافراندنی ئاوەها بوونێكا بێت. وەگەرنەسەرئەنجامی بێ دەرئەنجامییە.

بۆچونەکان

ناردنی بۆچون