كۆنگرێسی ئه مریکا بڕیارێكی بۆ پشتیوانی خۆپێشاندەرانی ئێرانی دەركرد

Kurdane.com

ئەنجوومەنی نوێنەرانی ئەمەریكا "كۆنگرێس" بە نزیكەی كۆدەنگی ڕەها بڕیارێكی بۆ پشتیوانی خۆپێشاندەرانی ئێران دەركرد دژی ڕژێمی وڵاتەكەیان، لە بڕیارەكە دووپات لە داوا ڕەواكانی گەلی ئێران كراوەتەوە و سەركۆنەی ڕەشبگیریی خەڵكیش لەلایەن ڕژێمی ئێرانەوە كراوە.

 
بڕیارەكەی كۆنگرێس بە زۆرینەی ڕەهای دەنگەكان پەسەند كرا، لە كۆی 417 كۆنگرێسمانی ئامادەبوو، 415 ئەندامی كۆنگرێس بە بەڵێ پشتیوانی پڕۆژە بڕیارەكەیان كرد، لە بەرانبەریشدا تەنیا دوو كەس دژی وەستانەوە، لە ناوەڕۆكی بڕیارەكەیش كۆنگرێسی ئەمەریكا پشتیوانی تەواوی خۆی بۆ خۆپێشاندانەكانی ئێران دووپات كردووەتەوە و هاوكات بەدیهێنانی داوا ڕەواكانی خۆپێشاندەرانیشی بە گرنگ زانیوە و سەركۆنەی ڕەشبگیریی خەڵكیشی لەلایەن كۆماری ئیسلامیی ئێران كردووە.
 
بڕیارەكە بە توندی پێشێلكارییەكانی مافی مرۆڤ سەركۆنە دەكات و چالاكییەكانی رژێمی ئێران بۆ تێكدانی خۆپێشاندانەكان و گرتن و ڕاوەدوونان و كوشتنیان. كۆنگرێسمانانی ئەمەریكا لە بڕیارەكە داوایشیان لە دۆناڵد ترەمپی سەرۆكی ئەمەریكا كردووە، سزای زیاتر بەسەر ئێران بسەپێنێت بەهۆی پێشێلكردنی مافەكانی مرۆڤ.
 
سەرۆكی لیژنەی كاروباری دەرەوەی كۆنگرێسی ئەمەریكا "ئاد ڕۆییس" گوتی، بە بەرگریكردنمان لە خەڵكی ئێران، دەمانەوێ ئەوە ڕوون بكەینەوە ئەو سزایانەی بەسەر رژێمی ئێرانی دەسەپێنین، مەبەستمان خەڵكەكەی نییە، بەڵكو سزاكانی ئەمەریكا دژی  ڕژێمی ئێران، كە ئارامیی ناوچەكەی تێكداوە نەك گەلی ئێران.
 
لە ڕۆژی 28ی مانگی ڕابردووەوە تا ئێستەیش خۆپێشاندانەكان لە ئێران بوونیان هەیه، بەڵام وردە وردە چالاكییەكانیان كەم دەبێتەوە، بەهۆی ڕەشبگیری و گرتنەبەری ڕێوشوێنی توند لەلایەن كۆماری ئیسلامیی ئێرانەوە، لە ئەنجامی خۆپێشاندانەكان تا ئێستە زیاتر لە 50 كەس كوژراون و سێ هەزار و 700 كەسیش گیراون.

بۆچونەکان

ناردنی بۆچون