ناوەند دیالۆگ ئڕا هاوکاری:
کوردستان لە وەرایوەر تاوانەیل ڕژیم بێدەنگ نیەو
( بانگەواز مانگردن و ئێئتساب گشتی لە کوردستان ئڕا پشتیوانی لە ناڕزایەتییە سەراسەرییەگان ئێران و ماکووم کردن جنایەتەیل ڕژیم لە ناوچەیل کرماشان و ئیلام و لوڕستان )
خەڵک خووڕاگر و موقاوم کوردستان
حزبەیل و لایەنەیل سیاسیی ئێران و کوردستان
ڕێکخراوەیل کوومەڵگای مەدەنی
مەوج نوو ناڕزایەتییە سەراسەرییەگان لە ئێران چوودە ناو دەیێمین ڕووژ خوەی. ئی ناڕزایەتییەیلە “نە” وتن ئاشکار، بەرز و گشتیی تریگە وە گشت کوومار ئێسلامی، سەبارەت وەو گشتە نامەتیی تاریخییە ک لە دریژای دەسەڵات خوەی ئڕا نەتەوەیل ئێران وە هەدیە و دیاری هاوردیەسی. ئامانج ئی ناڕزایەتییەیلە لە ئێران و کوردستان؛ سەنن ماف و ئازادی، گەڕانن و هاوردنەوەی کەرامەت ئنسانی و کووتایی هاوردن وە سیاسەت هاشاکردن، هاشییە خستن، کوشتن، تێرور و تەبئیزە نەتەوەیی و فەرهەنگییەگانە.

کوردستان لە 47 ساڵ وەرین پیشەنگ و ڕچەشکن ئەو “نە” وتنە و سەنگەر هەمیشەیی و خوە وەدەسنەیای ئازادیخوازی و وەرایوەربین دژ کوومار ئێسلامی بیە، هەوەیجوورە وەگەرد بزووتنەوە و شووڕش ژینا “ژن، ژیان، ئازادی” دەسەڵات دیکتاتوریی کوومار ئێسلامی ئێران تۊش گەوراترین قەیران شەرئیەت لە ناوخوو و دەیشت وڵات کرد. سەرئەڵدان ناڕزایەتییەگان لە ناوچەیل خوارین کوردستانیش نیشان دا ک ترۊسک ئەو ڕاپەڕینە هێمرای زنییە، هە ئەوەسە ک تەزاهوراتەگان وەتوندی سەرکوت کریان و لە مەڵکشایی تاوان گەوراییگ کریاسە.

ئێمە سەرکوت تەزاهوراتەگان و گردن خەڵک ناڕازی و مافخواز ئێران ک سیاسەت هەمیشەیی دەسەڵاتدارەیل ئێران بیە؛ وەتوندی ماکووم کەیم و وە مەبەست پشتیوانی لە ناڕزایەتییە سەراسەرییەگان و هەمپەیوەست وەل هاونیشتمانییەیلمان لە کرماشان ، ئیلام و لوڕستان داوای مانگردن و ئێئتساب گشتی کەیم لە ڕووژ پەنجشەمە 18ی وەفرانوار 1404 .
کوردستان وەی مانگردن گشتییە یەی جار ترەک “نە”ی گەورای تریگ وە دیکتاتوریی ئێسلامی ئۊشیدەو و پا دەیدە گەز لە سەر ماف و هەقەگان خوەی ک ئازادی، یەکسانی و مافە ڕەواگانییە. داوا لە سەرجەم هزبە سیاسییەگان و ڕێکخراوەیل مەدەنیێ ئێران و کوردستانیش کەیم وە هاودەنگی و یەکگرتییانە لە وەرایوەر تاوانەیل کوومار ئێسلامی بێدەنگ نەۊین و باینە پیری ئی بانگەوازە.
بژی هاوپشتی و یەکگرتیی خەڵک مافخواز کوردستان
بڕووخیەی کوومار ئێسلامی ئێران

• پارتی ئازادیی کوردستان
• پارتی ژیانی ئازادی کوردستان
• سازمانی خەباتی کوردستانی ئێران
• کۆمەڵە، ڕێکخراوی کوردستانیی حیزبی کۆمۆنیستی ئێران
• کۆمەڵەی زەحمەتکێشانی کوردستان
• کۆمەڵەی شۆڕشگێڕی زەحمەتکێشانی کوردستانی ئێران
• حیزبی دێموکراتی کوردستانی ئێران