دلشاد قبادی: لەی روژەیلە تمام جەهان شایەت سەرهەڵدانێک گەوران وە ناو “شۆڕش ژن، ژیان، ئازادی” کە لە شۆڕش-ئنقڵاب نزیکەو بوت. شۆڕشێک لە ئێران و رۆژهەڵات کوردستان و لە سەر دەس وەهێزتەرین و وەئێرادەتەرین هێز کۆمەڵگا، کە ئەویش شۆڕش ژنە.
شۆڕشێک وە دەس مەحرومتەرین ئەما وەهێزتەرین بەش کۆمەڵگاە لە نزامێک توتالیتەر و دیکتاتور. نزامێک کە نە لە قانون و نە لە ئەساسنامەی هیچ شوون و لوون و ئحترامێک ئەڕا ژن و حەق و حقوق و ئازادی ژن نەیری.
نزام سەرکوتگەر ئسلامی ئێران لە ناو ٤٣ ساڵ قورخ کردن دەسڵات، گشت هێز و توانای خوەی ئەڕا کپ کردن دەنگ ئازادیخوازی و عەدالەتخوازی ژن و گەلان ئێران و رۆژهەڵات کوردستان وەکار بردێە. ئەما ئێسە هێز ژینا ئەمینەکان و داریوش علیزادەکان فرە لە هێز سەرکوت جمهوری ئسلامی ئێران وەهێزترن.
ئێسە شۆڕش “ژن، ژیان، ئازادی” کە گشت چین و توێژەکان کۆمەڵگاە هاودەنگ و هاوشان یەکتر کردێە و لە چوارچوەی تەسمیم و ئرادەیک تاریخی و چارەنویس‌ساز، ئەڕا لە ناو بردن ئی نزام توتالیتەرە هاتنەسە خیاوان تا سەرکەفتن نەهایی ناتوانیەت دەنگێان کپ بکریەت.
شۆڕش “ژن، ژیان، ئازادی” کە ئێسە لە ئێران و رۆژهەڵات کوردستان لە سەر دەس و وە دەسپێشخەری ژن دەس وەپێ کردێە، خەیدەمانە هویر شۆڕش گەورای رۆژاوای کوردستان و کوبانێ کە وە دەسپێشخەری ژن دەس وەپێ کرد و سیەتەرین و وەحشیتەرین گروە تروریستی داعش لە ناو برد.
ئەگەر تا ئێسه ژن لە ژێر زوڵم و دیکتاتوریەت نزام و سیستمەیل دیکتاتور و پیاو سلار چوارگوشەی دیوار ماڵەکان ئەڕایان دیاری کریاوی، ئیسە دی تا خیاوان و ذەهنیەتەکان لە خەتەر، تەجاوز، بێ حورمەتی و ناعەداڵەتی پاکەو نەکەی، وچان نایەی.
ئی رویداوەیلە لە تاریخ پاوەگەزدان دموکراسی و ئازادیخوازی ئەڕا هەمیشە سەبت بوت. ئی رویداوەیلە فرە وەئەرزش و ڕەنگینن و توانن رۆشنایی ڕێ تازەیک ئەڕا گەلان ئێران و کوردستان و تەنانەت جەهانیش بووت.
شۆڕش ژن ریشەی ئسلام سیاسی و گشت لایەنەیل ئسلامگرای دویاکەفتێ شیعی و سەلەفی و ئەخوانی لە ناو بەی. جمهوری ئسلامی ئێران ماوەی ٤٣ ساڵە لە ژیر لەوای دین گشت کردەوەیل دیکتاتوری و زد وە ئەرزشەیل ئنسانی و ئخلاقی زد وە ژن و گەلان ئێران ئنجام دەی.
کوشتن “ژینا ئەمینی” لە لایەن هێزەیل سەرکوتگەر ڕژیم ئێران، تەنیا کوشتن ژینا نەوی، بەڵکو تەقالایک ئەڕا کوشتن و لە ناو بردن ناسنامە و ئرادەی ژن بی. ئەما داستان وەیجورە وەی ئاسانیە کە رژیم ئێران فکر کەی تەمام ناود، شۆڕش “ژن، ژیان، ئازادی” کە گشت چینەیل کۆمەڵگا لە خوەی گردێە گشت وجود نزام پیاو سالار جمهوری ئسلامی ئێران گردێەسە نیشان.
چشتێک لەیرە جێ باسە ئەوەسە کە بڕێک لە لایەنەیل سیاسی جوور سەڵتەنەت‌خوازەکان کە ٤٣ ساڵ پێش وەهێز ناڕەزایی گەل لە ناو بریان، ئێسە توان لە چوارچوەی شوعارەیلێک پیاگ سالاری جوور “مرد، میهن، آبادی” وە سوء ئستفادە کردن لە شوڕش گەلان ئێران، شۆڕش “ژن، ژیان، ئازادی” وە لاڕێ بوەن و دوارە دەسڵات دیکتاتوری خوەیان جێ بخەن.
ئەوەیکە لەیرە ئەڕا گشت لاێک خاس ئاشکارە ئەوەسە کە مەردم ئێران و کوردستان هانە خیاوان تا شوڕش بکەن نە ئەوەیکە ٤٣ ساڵ بچنە دویاوە. ئەوقەیکە سیستم دیکتاتور جمهوری ئسلامی ئێران لە گشت باوەت زەربەر دایەس لە حەق و حقوق و ئازادی گەلان ئێران، رژیم لەناوچی سەڵتەنەت هەمان ئندازە لەتمە دایەس.
ئیجارە دەسپێشخەریک کە ژن لە شوڕش “ژن، ژیان، ئازادی” ئەڕا وە دەس هاوردن ئازادی و حەق و حقوق ژن و گشت چینەیل کۆمەڵگای ئێران و رۆژهەڵات کوردستان کردێە، لە تاریخ پاوەگەزدان گەلان ئێران بێ وێنەس. جمشتێک کە توانست گشت چین و توێژەکان کۆمەڵگایەیل ئێران لە کنار یەک قەرار بێەی و وە یەکیەتیک گەورا هاوشان یەکتر زد وە رژیم دیکتاتور ئێران شوڕش بکەن. شۆڕشیک کە دەنگ و پشتیوانی گشت ناوەندەیل ناونەتەوەیی چوارگوشەی جەهانی وەرەو لای خوەی کیشاس.
ئیمە بایەد گشت هەوڵ و تەقالاێ خوەمان بخەیمە گڕ تا ئجازە نەیەیم دوشمنەیل گەل و نیشتمان، شوڕش ژن، ژیان، ئازادی کە وە دەسپێشخەری ژن دەس وەپێ کردێە وە لاڕێ بوریەت. بایەت گشت تەقالایک بکریەت کە دەسپێشخەری ئی شوڕشە لە دەس هێز ژن بمەنێ تا وە سەرکەفتن نەهایی خوەی بڕەسێ.
شوڕش ژینا- ژن، ژیان، ئازادی زامن زنەییک ئازاد و دموکراتیکە لە ئێران و رۆژهەڵات کوردستان و گشت جەهان
